Now Reading:
Azərbaycan-İran sərhədində iş rejimi dəyişdi
Full Article 1 minutes read


Mayın 10-dan etibarən Azərbaycan ilə İran İslam Respublikası sərhədində yerləşən Astara, Biləsuvar və Culfa gömrük-sərhəd buraxılış məntəqələri 24 saatlıq iş rejimində fəaliyyət göstərməyə başlayıb.

Dövlət Gömrük Komitəsindən (DGK) verilən məlumata görə, bu barədə hər iki ölkənin sərhəd və gömrük xidmətlərinin nümayəndələri arasında keçirilən görüşdə razılaşma əldə olunub.

Beləliklə, bundan sonra adı çəkilən gömrük-sərhəd buraxılış məntəqələrindən sərnişinlərin, yük və minik avtomobillərinin 24 saat keçidi təmin olunacaq. Bu, hər iki ölkə arasında ticarətin daha da surətli inkişafına, Şimal-Cənub tranzit dəhlizinin sutka ərzində fəaliyyət göstərməsinə, vətəndaşların gediş-gəlişində sıxlığın aradan qaldırılmasına xidmət edəcək.

Bununla bağlı sərhəd və gömrük xidməti sahələrində infrastruktur yenilənib və infrastrukturun daha da genişləndirilməsi planlaşdırılır. Eyni zamanda, gömrük orqanlarında idarəetmə strukturunda dəyişikliklər olacaq. İki ölkə arasında əldə edilən razılaşmaya əsasən Naxçıvan Muxtar Respublikasına 24 saat – 7 gün rejimində gediş-gəliş təmin olunacaq.

Qeyd edək ki, Astara, Biləsuvar və Culfa gömrük-sərhəd buraxılış məntəqələrinin 24 saatlıq iş rejiminə keçməsi Azərbaycan ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 12-ci iclasının Anlaşma Memorandumuna əsasən reallaşıb. Anlaşma Memorandumu bu il martın 14-də Tehran şəhərində imzalanıb.

Bir cavab yazın

24SAAT.ORG Xəbər Saytı
Azərbaycan və Dünyadan Xəbərlər
[mc4wp_form id=""]
Input your search keywords and press Enter.
%d bloqqer bunu bəyənir: