Loading...
AZƏRBAYCANCA   РУССКИЙ
Loading...

“Qanqster”in müdafiəsinə imza atan Əlibala Əsgərov danışdı: -“Burda bir axirət haqqı var”

Gürcüstanda yaşayan 100-dən artıq azərbaycanlı ziyalı hazırda həbsdə olan sabiq MTN generalı Akif Çovdarovun müdafiəsinə qalxıb.

Prezident İlham Əliyevə müraciət ünvanlayan bu şəxslər Akif Çovdarovun Gürcüstanda yaşayan azərbaycanlılara etdiyi yaxşılıqlardan söz açıblar. Onların bu hərəkatı Borçalı kökənli bir çıx tanınmışların kəskin etirazlarına səbəb olmuşdu.
Müraciəti imzalayanlardan biri, “Qeyrət” Xalq Hərəkatının sədri Əlibala Əsgərov A.Çovdarovu niyə müdafiə etməsi və müraciətin pərdə arxasından danışdı.
-Bəli, Akif Çovdarovla bağlı edilən müraciətdə mənim imzam var. O müraciətdə nə Akif Çovdarovun cinayətinin bağışlanmasını istəmişik, nə də törətdiyi hər hansı cinayətə görə əfvini. Sadəcə bölgədə müəyyən şayiələr yaranışdı ki, Akif Çovdarova qarşı türmədə qeyri-qanuni hərəkətlər törədilir, müəyyən basqılar var, buna görə də aclıq aksiyasına baş vurub. Bu səbəbdən də mənimlə danışanda mənə də müraciət ediblər. Müraciətlə tanış olandan sonra imza atmışam. Nə cinayətkarı qorumaq məqsədimiz var, nə də onun törətdiyi əməllərin əfvini istəyirik. Sadəcə istəmişik ki, təcridxanada xüsusi nəzarətə götürülsün və bununla da Borçalıda yayılan şayiələrə son verilsin. O müraciətin altında yüzdən çox şəxsin imzası var.
Mən də burda media sahiblərindən narazıyam. Məsələni kimə nə cür lazımdırsa, o cür işıqlandırır.  Guya bu müraciət borçalıların adından yayılıb… Orda məlum imzalar var. Müraciətin mətnini oxumusuzsa, orda heç də Borçalı əhalisinin, ziyalısının adından söz deyilməyib. O 100 imzanın arasında onun qohumları da var, atasını, ailəsini tanıyanlar da var. Bəli, mənim də imzam var. Sizi əmin edirəm, nə yaxından, nə də uzaqdan o generalı tanıyıram. Bir dəfə də olsun onunla üz-üzə gəlməmişəm. Sadəcə, bölgədə yayılan şayiələrə əsasən, prezidentə müraciət olunub ki, onun hal-hazırda davam edən istintaqı nəzarətə götürülsün. Heç bir cinayətkarı qanaraq nə mən, nə o imza sahibləri müdafiə etmir, onun bağışlanmasını istəmir. Qanun var, cinayətkar cəzasını almalıdır.
-Bəs bu müraciətin təşəbbüskarı kim olub? Mətni kim yazıb, sizə kim müraciət edib? Adınız ön planda hallandırılır… 
– Mənə onun qohumları müraciət etmişdi. Prosesin təşkilatçılarından deyiləm. Mən imzamı gizlədəsi deyiləm. Amma onu müdafiə etmirəm.
– Qohumlarından özümü xahiş edib belə müraciətin hazırlanması üçün? 
-Vallah eşitməmişəm. Yalan sözü necə deyim?  Mən onun özünü yox, atasını yaxşı tanıyırdım. Uzun müddət sovxozda direktor işləmişdi. Özü ilə yaxından-uzaqdan əlaqəm olmayıb.
-Əlibala müəllim, ortada pul faktoru olubmu? Yəni, müraciətin imzalanması, müdafiə işinə qoşulmanız üçün sizə hər hansı pul vəsaiti verilibmi? 
 
 
-Əsla, əsla, əsla! Mən həyatımda nə özümə, nə də uşaqlarıma haram loxma yedirməmişəm. Elə bir məsələdən söhbət belə gedə bilməz. Bunu kimsə deyirsə, onu da Allaha həvalə edirəm.
–  Müraciətdə az qala Akif Çovdarovun xeyriyyəçi obrazı yaradılıb. Yazılıb ki, “vəzifədə olarkən Gürcüstanda yaşayan azərbaycanlılar üçün az iş görməyib. Onlarla problem onun müdaxiləsindən sonra həllini tapıb. O, gördüyü bütün işləri Sizin ona verdiyiniz dəstək əsasında edib və bizi sizin apardığınız siyasəti dəstəkləməyə çağırıb”. Çovdarov həmyerliləri üçün nə edib ki? 
– Orda xeyriyyəçilikdən söhbət getmir. Sadəcə 90-cı illərə işarədir ki, o dövrlərdə müəyyən haqsızlıqlar vardı burada yaşayan azərbaycanlılara qarşı. Bir axın vardı həmin vaxt. O zaman Çovdarov müəyyən işlər görüb. Amma xeyriyyəçi olub, olmayıb, bunu bilmirəm. Mənə verilən müraciətdə xeyriyyəçi söhbəti olmayıb.
– Müraciətdə onun barəsində müsbət obraz formalaşdırmağa çalışmısız. Maraqlıdır, müsbət hesab olunacaq nələr edib? Müraciəti imzalamısız, ona görə sualı da sizə ünvanlayıram… 
– Təbii ki, bu gün heç kim deyə bilməz ki, o adam heç nəyə yaramır. İnsanın mənfi xüsusiyyətləri ilə paralel müsbət xüsusiyyətləri də olub. Olmasaydı onu general rütbəsinə qədər çıxarmazdılar. Ona dalbadal medallar verib, general rütbəsinə çıxaran dövlət heçmi onun yaxşı əməllərini görməmişdi? O medallar ona bəd əməllərinəmi görə verilmişdi? Yəni, hər şeyi öz adı ilə demək lazımdır.
– Bir faydası olacaqmı bu müraciətin, necə düşünürsüz? 
– Yenə də deyirəm. Bizim Azərbaycan dövlətinin daxili işlərinə müdaxilə etmək və cinayətkarı müdafiə etmək fikrimiz yoxdur. Sadəcə olaraq, Borçalının bir nümayəndəsi kimi, o müraciət mənə çatana qədər bu barədə gəzən söz-söhbətləri nəzərə alaraq, həmin sənədə imza atmışam. Təqdir Azərbaycan qanunlarınındır. Qanunlar necə əl verir, o cür də addım atılacaq.
 
-Hal-hazırda türmələrdə hüquqları pozulan çoxlu sayda Borçalı vətəndaşı var. Necə olur ki, başda da siz olmaqla yığışıb onların hüquqlarını yox, həbsdəki MTN generalını müdafiə edirsiz? 
– Qulaq asın… Bu müraciətə Bakıda yaşayan bir ziyalı, bir borçalılı da olsun qol çəkməyib. Burda yerli əhalidir, qohumdur, tanışlardır, yaxın ətraf, ata-anasını tanıyanlardır. Heç kim də demir ki, onu əfv edin. Sadəcə deyilir ki, onun işini nəzarətə götürün. “Ay, bütün borçalıların ziyalıları bunu müdafiə edir…” Belə bir söhbət yoxdur. Eloğlumuz Tofiq Yaqublu da həbsə düşəndə mənim etirazlarım olub…
 
-Tofiq Yaqublu həbs olunanda siz dövlət başçısına belə müraciət etməmisiz… 
-Dəfələrlə biz ona etiraz etdik. Müraciətimiz yox idi… Yox idi, ona görə ki, mediaya sərf etmirdi onu hallandırmaq.
-Necə sərf etmirdi? Biz Tofiq bəylə bağlı bütün xəbərləri verirdik… 
-Açıq deyirəm, adlarını qoyublar müxalifət funksioneri. Hərəsi bir adamın adı ilə sayt işlədir. Hər nə varsa, çılpaq şəkildə, öz adı ilə demək lazımdır. Mən imzamı da danmıram. Əgər mənim bu müraciətin imzalanmasında hər hansı maddi marağım olubsa, pul almışamsa, xeyir ola, həmin saytlar bunu hardan biliblər? Ayıbdır, bu qədər həyasızlıq edib, adamın üstünə getməzlər. Yalan söhbətləri yaymazlar. Bütün o yazıların altına imza qoyanları Allaha həvalə edirəm.
 
-Yəni, peşman deyilsiz belə bir müraciətə imza atdığınız üçün… 
-Deyiləm… Qətiyyən. Hər bir cinayətkarın da hüququ var. Cinayətkardır, qatildir, canidir… amma onun da insan kimi hüquqları var və pozulmamalıdır.
-Növbəti dəfə də Akif Çovdarovla bağlı sizə müraciət olunsa, ona imza atacaqsınız? 
-Baxır hansı formada müraciət. Eyni sözü təkrarlaya-təkrarlaya durası deyilik. Vəziyyətə baxacağıq. Yenə də deyirəm: imzamı danmıram, imzamda heç bir məkrlilik, Azərbaycan qanunlarına qarşı çıxan, Azərbaycan dövlətini aşağılayan bir maddə görmədim. Sadəcə, bir insan kimi, regionda olan bir ağsaqqal kimi, onun ailəsini nəzərə alıb, bun müraciəti imzaladım. Burda bir axirət haqqı, qonşuluq haqqı da var.
-O zaman siz Akif Çovdarovla uşaqlıq dostu olmusuz… Qonşuluq haqqı dediniz, ona görə. 
-Mən Akif müəllimi qabağımdan gəlsə tanımaram. Atasını gözəl tanıyıram. Mən nə o kənddənəm, nə də o rayondan. Sadəcə mənim gəncliyimdə o rayonun ağsaqqalı idi. Məktəb direktoru işləmişdi, sonra sovxoz direktoru işləyib. Mənim də onunla münasibətlərim olurdu, görüşəndə hal-əhval tuturduq. Amma Akif Çovdarovu şəxsən tanımamışam, görməmişəm…
-Amma yəqin ki, tutulmazdan öncə barəsində yayılan xəbərləri izləmisiz… Elmar Hüseynovun qətli, Aqil Xəlilin döyülməsi… Bunlar sadəcə medianın bildikləridir. 
-Hardasa oxumuşam. Yenə də deyirəm, cinayətkardır. O cinayəti də ört-basdır eləmək istəmirik, cinayətkarın da müdafiəsinə qalxmırıq. Sadəcə hər bir cinayətkara da qanunlar var, ona qarşı da qanunlar işləməlidir. Söhbət vardı ki, Akif Çovdarov aclıq edir, intihar edəcək. Yerli camaat onun intihar edəcəyinə heç ehtimal vermirdi. Deyirdilər ki, başına oyun açacaqlar, sonra da buna intihar süsü verəcəklər. Belə şayiələr olduğu üçün belə müraciət ərsəyə gəldi. (musavat.com)

24saat.org
Loading...

Deputatdan əcayib təklif: Suyun qiyməti qaldırılsın

Sonrakı Yazı »

68 yaşlı qadının vəhşicəsinə ölümü: ata ilə oğlu üz-üzə – qatil kimdir?

%d bloqqer bunu bəyənir: